കമ്പ്യൂട്ടറിനെയും മൊബൈല്‍ ഫോണിനെയും പറ്റി അറിയേണ്ടതെല്ലാം ശ്രോതാക്കളിലെത്തിക്കാന്‍ ആകാശവാണി തുടങ്ങിയ പരിപാടിയുടെ പേരാണ് സൈബര്‍ ജാലകം. കമ്പ്യൂട്ടറുമായി ആകാശവാണി അടുത്തിടപഴകാന്‍ തുടങ്ങിയിട്ട് അധികനാളായിട്ടില്ലായിരിക്കാം. എന്നാല്‍ ഒരു ശരാശരി കേരളീയന്റെ സ്ഥിതി അതല്ല. കമ്പ്യൂട്ടറുമൊത്തുള്ള ജീവിതയാത്രയില്‍ അവന് ബഹുദൂരം മുന്നിലാണ്. ഈ രംഗത്തെ ഏറ്റവും പുതിയ ട്രെന്റുകളെ കുറിച്ചാണ് അവന് അറിയേണ്ടത്. പി.എസ്.സി. പരീക്ഷയിലോ പ്രൈമറി ക്ളാസിലെ വിദ്യാര്‍ഥികള്‍ക്കുള്ള ഐ.ടി. ക്വിസ്സിലോ ചോദിക്കാനിടയുള്ള ചോദ്യങ്ങള്‍ക്ക് ഉത്തരമൊരുക്കിക്കൊടുക്കലാണ് ആകാശവാണിയുടെ ലക്ഷ്യമെങ്കില്‍ അതിനെ അംഗീകരിക്കുകയേ നമുക്ക് പോംവഴിയുള്ളു.
ഇനി വേണമെങ്കില്‍ ആകാശവാണിക്ക് പറയാം , ഞങ്ങള്‍ സാധാരണക്കാരായ പ്രേക്ഷകരെയാണ് അഭിസംബോധന ചെയ്യുന്നതെന്ന്. അവര്‍ക്കും ഇത്തരം കമ്പ്യൂട്ടര്‍ വിദ്യാഭ്യാസം കൊണ്ട് ഒന്നും നേടാനില്ലെന്നതാണ് സത്യം.
എന്തൊക്കെയായാലും ഇത്രയും പഴഞ്ചന്‍ വിഷയങ്ങള്‍ പുനപ്രക്ഷേപണം ചെയ്ത് ശ്രോതാക്കളെ ഭൂതകാലത്തില്‍ തളച്ചിടരുതെന്ന് എന്നൊരഭ്യര്‍ഥനയുണ്ട്. സെര്‍ച്ചിന്‍ എഞ്ചിന്‍ എന്ന മഹാകാര്യത്തെ പറ്റി രണ്ടു തവണ ഈ പംക്തിയില്‍ നിന്ന് കേള്‍ക്കാനുള്ള നിര്‍ഭാഗ്യം ഉണ്ടായി. ഇന്ന് (മാര്‍ച്ച് ഇരുപത്തിയഞ്ച്) രാവിലെയായിരുന്നു രണ്ടാം പ്രക്ഷേപണം- ഇന്റര്‍നെറ്റ് എക്സ്പ്ളോറര്‍, മോസില്ല ഫയര്‍ഫോക്സ് എന്നിത്യാദി എഞ്ചിനുകളെപ്പറ്റി നമ്മെ വീണ്ടും വീണ്ടും ഉദ്ബുദ്ധരാക്കാനുള്ള ശ്രമത്തിലാണ് ആകാശവാണി.
